السبت، مايو 10، 2008

فزورة مش عاوز حد يحلها ... أرجوكم


استدعى الاب ابنه لغرفته و ما إن رأه امامه الا وبادر بتوجيه


هذا السؤال


الأب : هتعرف يابنى تحافظ على الثروه اللى هتورثها من بعدى؟


الإبن : طبعا يا ابا تربيتك


الأب : يعنى هتعرف تربى الكتاكيت زى ما انا ربيتهم؟


الإبن : ( باندفاع وحماسه الشباب ) اكيد يا ابا


الأب : طيب هات الكرتونه اللى فيها الكتاكيت دى


فسارع الإبن باحضار الكرتونة ووقف أمام أبيه


الأب : اقلب الكرتونه على الارض وورينى ازاى هتقدر تلم فيها الكتاكيت تاني


وبسرعة قلب الابن الكرتونه وما ان رفعها حتى انطلقت الكتاكيت فى


أرجاء الغرفه واندفع الابن خلفها يحاول جمعها مره اخرى ولكن هيهات ،


وبعد أن أدرك الفشل وقف أمام أبيه وقد ارتسمت على وجهه البلاهة والغباء


ولم يوقظه الا صفعة قوية من أبيه


الأب : شوف يا غبى اللى هاوريهولك


ده خلاصه 26 سنه فى تربيه الكتاكيت (يعنى من سنه1981)


ثم اخذ الأب الكرتونه بعد ان جمعا فيها الكتاكيت أخذ يهزها بقوة يمينا ويسارا


وسط صراخ متواصل من الكتاكيت ما لبس ان تلاشى وانقطع نتيجه ما أصابها من إعياء


الأب : الان فقط نقلب الكرتونه وما ان رفعها الا وشاهد الإبن الكتاكيت لا تحرك ساكنا


مما اصابها من اعياء ودوار ثم قام بتعبئتها فى الكرتونه بمنتهى السهوله واليسر


الأب : دلوقتى يا ابنى اتعلمت اهم حاجه فى تربيه الكتاكيت وهى


( إتعبهم يريحوك، إنفخهم يريحوك أكتر، لكن لو ريحتهم هيتعبوك )


لو عرفت ،



مين هو الاب ؟


ومين هو الابن ؟


ومين هما الكتاكيت ؟


أدخل عشتك وخليها فى سرك

هناك 10 تعليقات:

la3lahakhier يقول...

ههههههههههههههه
ماشى

Mona Shereif يقول...

ههههههههههههههههههه
لا جامدة

ليك تاج عندى ياريت تقبله
تحياتى

عازفة الكمان يقول...

لا بجد حلوه وظريفه كمان

بنت مصريه يقول...

يا سلام عليك يا دكتور محمد
مش بقولك بوستاتك كلها حكم
معروفه اكيد بس انا مقدرش اقولك غير عالكتاكيت
الكتاكيد هى احنا
احنا الشعب الغلبان
وخلى ف سرك بقيت الاشخاص

غير معرف يقول...

هاهاهاها فزوره ومش عايز حد يحلها ليه انت خايف ولاايه يادك

سفينة يقول...

la3lahakhier

ميرسي قوي علي تشريفك ويارب يوفقك
__________________
Sometimes

انا مش عارف اشكرك ازاي علي التاج ده عشان دا اول تاج حد يقولي عليه في حياتي وعشان كده مش عارف اقبله ازاي او اعمل ايه فيه...اعذريني علي قلة ذكائي بس عاوزك تعرفيني واستحمليني شويه...وميرسي مره تانيه
__________________
rasha

منوراني دايما يارشا ويارب دايما تكوني بخير وتشرفيني علطول بزيارتك الجميله
__________________
بنت مصريه

ياسلام عليكي يادكتوره انجي
والله انتي زي العسل
ومش عارف ليه انتي بالذات بهتم بتعليقك عندي وببتسم لما اشوفك معلقه عندي وبكون سعيد لما بزور مدونتك
يارب تكوني بخير دايما واسمع عنك كل خير

__________________
غير معرف ...

ها ها ها ها ها ها ها
مش عاوز حد يحلها عشان خايف علي اللي يحلها مش خايف علي نفسي
انا لو بخاف مكنتش كتبتها اصلا
وعموما بجد سعيد بتعليقك وهكون سعيد اكتر لو عرفت مين حضرتك
الا اذا كنت انت اللي خايف تعرفني انت مين،وساعتها هعرف ان انا عندي قدر كافي من الشجاعه،علي الاقل اكتر شويه من اللي عندك
اشكرك مره تانيه علي تشريفك عندي واتمني تتكرر تاني كتير..سلاااام
___________________________________

غير معرف يقول...

احب انك تعرفني لوحدك وشكرا علي خوفك علي الناس وشكرا علي اتهامك اني مش شجاع وما تقلقش هشرفك كتير ويارب تقدم الجديد من المواضيع دايما دايما دايما سلااااااااااام

سفينة يقول...

غير معرف ...
مع اني مش عارف بالظبط انت مين ومع اني لم اتهمك بعدم الشجاعه بس برضه سوري،بجد اسف لو كلامي زعلك،انا بتكلم بحسن نيه والله مش قصدي اكون جارح او غلس او اي حاجه وحشه
بس هو فيه عندي سؤال برئ جدا

هو انا هعرفك لوحدي ازاي؟؟؟
ولو مصمم انك متقولش انت مين قولي سبب مقنع لكده والا معدتش هقدر ارد علي اي تعليق ليك
وبرضه تشرف مدونتي في اي وقت
البيت بيتك يعني بس لو عايزني ارد علي تعليقاتك
قدامك حل من اتنين
اما تعرفني بنفسك،واما تقول لي سبب مقنع لعدم كشف شخصيتك ليا وانا هحاول اقبله بس لو مقنع فعلا
سلااااااااااااام

Mona Shereif يقول...

بسيطة يا دوك
انت تؤمر
كل اللى هتعمله يا سيدى
هتعمل كوبى لــ


اولا : اذكر عشرة اشياء عن نفسك
ثانيا : اختار خمس اشخاص تهدي لهم التاج
ثالثا : لاتهدي التاج لمن اهداه اليك
رابعا : عرف اللي بعتلك التاج انك نزلته عندك


ومن ثم تجاوب عليه فى بوست عندك
زى مانا عملت بالظبط
تحياتى

غير معرف يقول...

والله انت فعلاً دكتور يا دكتور والله فعلاً عندك حق فى اللى انت قولته ده عاشان ده فعلاً اللى بيحصل مع الشعب الغلبان بس انا عاوز اقوللك على حاجة الشعب هو اللى عمل كده فى نفسه عاشان ادى فرصة من الاول ان هو يتهشك لكن لو كان ليه واقفه من الاول ما كنش سمح لحد ان هو يهشكه ويدوخة ويتعبة وعلى العموم شكراً على الفزورة الحلوة بتاعتك