على اسم مصر التاريخ يقدر يقول ما شاء
أنا مصر عندي أحب وأجمل الأشياء
باحبها وهي مالكه الأرض شرق وغرب
وباحبها وهي مرميه جريحة حرب
باحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلقيني جنبها في الكرب
والنبض ينفض عروقي بألف نغمة وضرب
على اسم مصر
مصر النسيم في الليالي وبياعين الفل
ومرايه بهتانة ع القهوة .. أزورها .. واطل
القى النديم طل من مطرح منا طليت
والقاها برواز معلق عندنا في البيت
فيه القمر مصطفى كامل حبيب الكل
المصري الباشا
بشواربه اللي ما عرفوا أبدا
في يوم طعم الذل
ومصر فوق في الفراندة واسمها جولييت
ولما جيت بعد روميو بربع قرن بكيت
ومسحت دموعي في كمي ومن ساعتها
وعيت على اسم مصر
صلاح جاهين
هناك 7 تعليقات:
أول تعليق.........
هيه هيه هيه ...........
لو لم أكن مصريه .........
لوددت أن أكون مصريه..........
معلش بقى طمع.....
بس انا ملقيتش حد علق.
وأشك ان ممكن حد يعلق بكلام حلو لانى عارفه شعور كل المصريين.طبعا بيكرهوا مصر.
بس أنا عاوزة اقول حاجه , ياجماعه فى فرق بين مصر , وبين اللى بيحكموا مصر.
صدقونى ................
أنا أعرف واحده كانت بتقول أنا بكره مصر دى كره العمى.
عارفين هى بقالها 3 شهور الوقتى مسافرة وبتقول ولا يوم من ايام مصر.
على رأى شيرين.........
يمكن مش حاسس عشان مش واحشاك ولاغبت عليها , بس اللى مجرب وفارقها قال فى الدنيا مفيش بعديها.
زعلان منك يابوسي
تفتكري ان فيه حد في الدنيا دي ممكن يكره مصـــــــــر
سواء كان مصري او مش مصري
بس علي فكره
انا بكره مصـــــــــر
بكره مصر كحكومه
بكره مصر كنظام سياسي اثبت في كل ثانيه انه نظام فاشل
بكره مصر كمسؤلين مش بيقدروا ولا بيحترموا معني آدمية المواطن المصري واحترامة
بكره في مصر كونها واحده من اكبر الدول الفاسده في العالم بسبب اللي ماسكينها طبعا
لكن بحب فيها اهلها وناسها الطيبين
بحب فيها كل ذرة تراب تعفر جلابية كل مواطن مصري شريف بيكسب لقمته بعرق جبينه
بحب فيها النيل والاهرامات
بحب فيهاانها طول عمرها رافعه راسها
طول عمرها زعيمة كل العرب
هعيش وانا بحب مصر وهموت وانا بدافع عنها ضد اي حد عاوز يمسها بسوء
كفاية انها مصر وكفايه انها بلدي
بس في الوقت الحالي بدعي واقول ياااارب
يااااااارب
يااااااارب
يااااااارب
ايه الكلام الجامد اللى فى التعليق ده يا محمد ... صلاح جاهين مين بقى
أنا مصر عندي أحب وأجمل الأشياء
فعلا عندى احب وطن واحب شعب
بس لأمتى هنحب من طرف واحد نفسنا فيها وهى بترفع راسنا فى كل مكان وأقول انا مصرى ... عارف فى الخارج تقول مصرى يقولك هما بيحترموكمفى بلدكم علشان احنا نحترمكم
طبعا قصدى على اللى ناهبين ومسكين وحاكمين البلد وكأنها عزبة أبوهم واحنا العبيد
اللى عايزين يعملوه فى العبيد بتعتهم يعملوه حكم ظالم نهب لثروات بلدنا وكتييييييييييييييييييير كمل انت بقى
انا عند أمل واحد ان حبى للشعب ده ميتهزش ولا يضعف
انا عارف انه بشعبنا ده هترجع مصر تانى زى زمان
وان شاء الله يا مصر كلنا فداكى
ومهما حصل انت فى قلبى أحب وأجمل الأشياء.
ايه يا عم الكلام الجميل ده
انت عارف مصر جميله جدا بس ضيعوا جمالها ولاد اللزين
انا عرفت انك بتحب الابتسام والضحك
لو عايز تضحك بجد نورنى
استشفيت من كلامك انك بتحب الضحك انا استشاريه نفسيه وبعرف اقرأ ما بين السطور
سفينه
شهادتك دى انا بعتبرها وسام على صدرى اغلى من اى جايزه والله وده امبلى
gana_love204@yahoo.com
اى خدمه يا سيدى
إرسال تعليق