أول تاج فى حياتى

أولا : أذكر عشرة أشياء عن نفسك.

ثانيا : اختار خمس أشخاص تهدي لهم التاج.

ثالثا : لا تهدي التاج لمن اهداه اليك .

رابعا : عرف اللي بعتلك التاج إنك نزلته عندك.

في البداية أحب اشكر الإنسانة الجميلة اللي أهدت ليا التاج ده

وأحييها علي شخصيتها الجميلة وأتمني لها كل توفيق

ونجاح دائم بإذن الله تعالي .

علي فكره صعب قوي ان الانسان يتكلم عن نفسه لأنه غالبا مش هيقدر يقيم نفسه صح لأنه اما هيركز قوي علي صفاته الحلوه وفي الحاله دي ممكن يتقال عليه مغرور،وإماهيظلم نفسه ويذكر صفات وحشه ممكن حتي متكونش عنده عشان محدش يتهمه الاتهام الظالم ده،أو ممكن يكون هو فعلا مش عارف صفاته الحلوه أو عيوبه ومحتاج حد ينبهه للعيوب دي وهنا ييجي دور الصديق المخلص،

علعموم أنا هحاول الإجابه بكل صراحة وحياديه ووضوح علي التاج ده واترك لحضراتكم التعليق علي الكلام،أو بمعني أصح تقولوا رأيكو انتوا في الشخصية،وانا متأكد ان احنا كلنا متفقين ان مفيش انسان خالي من العيوب

أولا : عشرة أشياء عن نفسي

1-بكون في أسعد حالاتي وفي أتم الرضا عن نفسي وعن العالم كله إذا كنت قريب من ربنا سبحانه وتعالي ومنتظم في قراءة القرآن الكريم يوميا.

2-أكتر حاجه بخاف عليها ومنها في حياتي زعل أمي مني،أو حتي انها متكونش راضيه عني ولو ثانيه واحده،وربنا يخليهالي يارب.

3-ممكن اعتبر نفسي صديق مخلص جدا بحب أصدقائي لدرجة اني ممكن أفضلهم علي نفسي ساعات،وعلي فكره أصدقائي قليلين جدا.

4-أنا أعترف ان انا احيانا بكون غلس شويه مع اخواتي، بحكم ان انا الأخ الاكبر ليهم يمكن دا بيصنع مني دكتاتور في بعض الاحيان بس برجع ازعل تاني من نفسي واصالحهم بسرعة وهما عمرهم مابيزعلوا مني عشان عارفين ان هما اغلي حاجه عندي في الدنيا دي كلها0

5-واحده من عيوبي اللي مزعلاني قوي وبتزعل الناس اللي ميعرفونيش مني هي عدم الحفاظ علي المواعيد بس انا بحاول جاهدا بقالي فتره اكون ملتزم في مواعيدي مع الناس اللي تعرفني كويس أو متعرفنيش0

6-أعتقد ان انا انسان رومانسي جدا وحساس جدا بدرجة كبيره قوي وفيه جوا قلبي حب يكفي الدنيا كلها ومش ببخل بالحب ده علي اي انسان،بس كل الحب ده بعتبره نقطة في بحر من الحب اللي انا موفره للإنسانه اللي أنا هرتبط بيها وهتكون

خطيبتي وزوجتي ان شاء الله0

7-بحب عائلتي جدا وبعتبر نفسي محظوظ لكوني واحد من العائلة دي واسعد اوقاتي بقضيها وانا بزور أي أسره فيها لدرجة إن أنا بعتبر كل واحد في العيله واحد من أسرتي0

8-بكون عارف حاجات كتير قوي صح المفروض تتعمل ومش بعملها كلها،وعارف حاجات غلط والمفروض انها متتعملش وبرضه احيانا بعملها ،بس في الحالتين بكون زعلان قوي من نفسي وبحس بتأنيب ضمير جامد جدا0

9-أنا واحد من الناس الطموحين جدا،عندي طموح ورغبة في النجاح ملهاش حدود واتمني اكون أنجح انسان في العالم،بس بشرط أحس إن نجاحي ده كل المحيطين بيا مستفيدين بيه،يعني بشكل أو بآخر ماكونش أناني0

10-بعتبر نفسي إنسان متفائل جدا،مهما كانت الظروف اللي حواليا صعبه بحاول أتغلب عليها واشوف الجانب الجميل في أي شئ ظاهره مش جميل،بس في نفس ذات الوقت بكون عصبي جدا احيانا ،بس غالبا العصبيه دي وعدم التصرف بحكمة في الأمور بيكون في أشياء ومواضيع غير مصيريه في حياتي ودي واحدة من مليون حاجه أنا بشكر ربنا عليها0

وأنا علي فكره قبل ماانسي،بهدي التاج ده برضه لأول خمس ملايكة يعلقوا عندي علي البوست ده0